حسيت اكتر من مرة إنك مريت بموقف معين واتكرر قدامك بحذافيره ولمدة ثواني عقلك توقف عن التفكير وكل اللي قدر عليه أنه يحاول يفتكر نفس الحدث ده حصل امتى وفين وللأسف بلا إجابة ..
كلامنا النهاردة عن ظاهرة "الديچاڤو" "deja Vu" وهي الترجمة الحرفية للفرنسية عن جملة "وهم سبق الرؤية" ..
عالم النفس "فرويد" صنف الأمر على إنه "أمر خارق للطبيعه" ووضع له علماء النفس تعريفًا .. الشعور الذي يشعر به الفرد بأنه رأى أو عاش الموقف الحاضر من قبل . يلازم هذه الظاهرة ثلاثة مشاعر مختلفة، أولهم وهم المعرفة المسبقة وشعور بـالرهبة و شعور بالإنفصال والغربة !.
تعالى اوصف لك اللي بيحصل معاك بناءُ على تجربتي أنا الشخصية يعني .. أولاً انت بتكون قاعد وسط مجلس معين، وفجأة بتحس بانك انفصلت عنهم لثانية وبتحس بألفة غريبة وجواك بيصرخ "أنا شفت الموقف ده قبل كده" وعقلك بيبدأ يعرض لك نفس الموقف لمدة ثواني ومع العرض في المخ بتبدأ الصورة تتهز وتشعر وكأن الذكرى دي بتتمسح مثلاً من مخك ببطء كده ..
اول تفسير قالوه إن الموضوع متعلق بالنظر، وإن في عين شافت قبل الثانية باجزاء من الثانية وده عمل خلل في الذاكرة، جعلك تقف الوقفة المُذبهلة دي، مستغرب، لكن التفسير ده تم رفضه عشان في حالات غير متعلقة بالعين تمامًا زي إنك تسمع حاجة وتحس إنك سمعتها قبل كده او إنك تشم رائحة وتحس انك شمتها قبل كده ..
المهم إن الأطباء بيقولوا ان اللي بيحصل ده في مدة الثواني دي هي عملية "missmatch" في المخ أو خلط في الاحساس بين الماضي والحاضر ..
رأي طبي تاني شايف إن المشكلة تكمن في كون "الدماغ" مُكونة من فصين، فص ايسر وفص أيمن شغالين سوا في نفس الوقت، ولكن في اللحظة دي واحد منهم بيسبق التاني بجزء من الثانية، فالفص اللي سبق الآخر بيوصل المعلومة للتاني متأخر جزء من الثانية، وعندما يدرك الانسان ده بيشعر وكأنه مر بنفس الموقف من قبل كده!.
رأي قدمه البعض وهو أن المعلومات اللي المخ بيستقبلها اللي المفروض تروح للذاكرة قصيرة المدى راحت للذاكرة طويلة المدى الاول عن طريق خطأ غير معروف فلما الذاكرة قصيرة المدي تيجي تراجع المعلومات تلاقيها زي اللي موجوده في الذاكرة طويلة المدى فبيعتبرها المخ ذكرى قديمة او مألوفة وحصلت قبل كدة!.
نيجي بقى للرأي اللي انت مستنيه "رأي المهتمين بعلوم ما وراء الطبيعه" ودول رأيهم فعلاً كان عجيب ..
والرأي المثير بقى انهم مؤمنين بنظرية تُسمى "تجربة ما قبل الولادة" ومفادها أن الروح قبل ان تسكن الجسد بتعيش كل لحظة سيعيشها الإنسان بعد الولادة وسكون الجسد، وإن الطفل الرضيع بيكون في مرحلة نسيان تلك التجربة حتى فترة معينة بيبدأ فيها تجربة الحياة وتسجيلها في الذاكرة، وممكن يحصل أنه في بعض اللحظات يتذكر الإنسان بعضًا من تلك الذكريات إذا تكررت أمامه ولكنه لا يتذكر اين وكيف ومتى!؟
يرى اخرون ان في فترة حمل الأم يكون الحمل يرى الرضيع كل شريط حياته يمر أمامه بالكامل، ولكنه مع الحياة لا يتذكر إلا "الديچاڤو" في بعض اللحظات والمواقف..
آخر نظرية هعرضها لكم .. هي نظرية الأكوان الموازية، ويمكن دي اغرب نظرية واللي بتفترض أن الكون مُكوَّن من اكثر من عالم على خط متوازي، وبتفترض كمان إن كل واحد منا بيعيش بشخصية مختلفة في كل عالم على حدة، يعني زي عالمي "مارڤل" و "دي سي" السينمائيين كده، فمثلاً أنت في هذا العالم دلوقتي قاعد بتقرأ مقال عن "الديچاڤو" ومثقف اوي، في عالم تاني انت شخص شرير سيء، او رئيس دولة مثلاً، هكذا شوف خيالك يجيبك فين بقى!.
المهم أنت عمرك ما زرت السعودية قبل كده، ويوم ما تزورها تشعر وكأنك زرتها قبل كده ويحصلك ظاهرة "ديچاڤو" هناك، ده هيكون بسبب إن أنت في احد العوالم الموازية دي زرت السعودية قبل كده!.
وينطبق هذا التفسير مع قول عالم الفيزياء "ستيف وينبرج" الحائز على جائزة نوبل، أن هناك عدة حقائق متواجدة معًا داخل أكوان متوازية في نفس البقعة والمكان!.
المُهم إن ظاهرة الديچاڤو موجودة ومثبتة ولكن لحد النهاردة محدش لاقي لها تفسير ثابت جامع مانع، لكن في المقال ده تم تجميع النظريات اللي ناقشتها كلها ..
قولي دماغك ارتاحت لأنهي تفسير فيهم ؟
#مصطفى_محمود