 |
| شريف الشوادفي شريف |
(طريقة سقراط)
كان سقراط لو عايز يقنع اي حد بحاجة يبدأ بأنه يسأل اسئلة عامة نسبيا ف موضوع كل الناس متفقين عليه تقريبا بعدين ياخدهم حتة بحتة ف الحتة اللي عايز يقنعهم بيها الفكرة اللي عايز يبيعهالهم.
لو سقراط هيبيعلك الكورس معين مثلا ..
والله مشكلة ارتفاع الدولار والتضخم خلت عيشة الناس صعبة.
الاسعار بقت الضعف تقريبا.
الواحد مننا عايز يشتغل شغلانتين عشان يقدر يسد التزاماته.
مصاريف مدرسة اتينا لغات لوحدها اكبر م المرتب!
محتاج تتعلم حاجة بسرعة ف وقت قصير ويكون فرص شغلها كتير وتقدر تشتغلها م البيت بعد مواعيد شغلك.
ايه رأيك لو في كورس صغير وبسيط يدخلك مجال التسويق تشتغل بيه شغلك التاني م البيت وتوفر مصدر دخل جديد ليك من غير ميأثر علي شغلك الاساسي؟
سقراط مكنش بيقنع الناس بأفكاره .. كان بيوصلهم ليها!
ملحوظة: تقدر تطبق الطريقة دي علي اي منتج وتستخدمها سواء ف ميتينج مبيعات او ف بوستات علي بيدج الفيسبوك وتقدر تحط الاسئلة كلها ف بوست واحد وتقدر تعمل كل سؤال ف بوست .. الفكرة واحدة انت شكلها براحتك.
تقعد فين لو عايز تقنع حد بحاجة؟!
خليك علي يمينه .. مخ البشر بيفضل المعلومات اللي بتيجي من الاذن اليمين اكتر من الشمال ودا بحث عمله لوكا توماسي الدكتور ف جامعة غابرييلي دانونزيو في ايطاليا ومذكورة بردو ف كتاب Brainfluence لو حد حابب يتأكد م المعلومة
مسألتش نفسك ليه من قديم الازل كل اعلانات البيرفيوم الرجالي البناطيل الجينز كريمات الشعر الفانلات الداخلية العربيات الساعات كل المنتجات الرجالي تقريبا بتلعب علي حتة انه هتخلي الراجل البنات تحبه ومازالت مستمرة الفكرة ومازالت بتجيب مبيعات وهتفضل تجيب عشان الفكرة قايمة علي علم النفس الراجل بطبيعته من زمان او دلوقت او ف المستقبل يهمه اوي يكون مقبول م الانثي عشان لو مش مقبول مش هيعرف ينقل المادة الوراثية بتاعته (تحس انه الرجالة مصلحجية سيكا ) المهم الحتة دي من كتر مبتجيب مع الرجالة سموها علماء التسويق Psychological Hot Button حطها ف اي منتج هتبيعه .. يقابلها نقطة نفسية عند الانثي انها تكون الاجمل يعني اعلان الرجالة هات بنات حواليه لكن اعلان البنات هات حواليها بنات بردو بس بين انها الاجمل واعلانات منتجات الشعر مثلا كلها قايمة علي انه واحدة خيبانة شعرها بيقع والتانية ناصحة بتستخدم المنتج واحلي منها او مجموعة بنات كلهم بشرتهم فيها مشاكل الا اللي بتستعمل المنتج وشها منور بنات ف بنات مفيش رجالة ف الموضوع (تحس اننا مهمشين سيكا)
هل ممكن المطاعم تأكل الناس اكل كلاب والناس تاكله ومتحسش الفرق؟
ف 2009 علماء الاعصاب عملوا تجربة بعنوان:
Can People Distinguish Pate from dog food?!
خلوا شيف يجهز 5 اطباق بطريقة هاي كلاس خالص بشرط يكون فيهم طبق فيه اكل كلاب ومش هيقدموهم للناس وخلاص لا دا هيعرفوهم انه فيه ف ال 5 اطباق دول طبق فيه اكل كلاب ومطلوب منك تعرفه وكانت النتيجة ان محدش عرف يفرق ودا تفسيره انه المخ بياكل قبل اللسان لو انا اديتك اكل الكلاب ف الكان بتاعته مرسوم عليها كلب لسانك هيحس بالفرق لكن لو حطيته ف طبق ف مطعم شيك لسانك هيقول هاتلنا تاني.
ادراك المخ للاشياء بيكون متحيز مش بيكون ادراك خارجي للحاجة زي ماهيا علي طبيعتها لكن بيكون من منظور داخلي يخليك تحكم عالحاجة انها حلوة او وحشة بناءا علي جوانياتك ومعتقداتك مش بناءا علي الحاجة نفسها لو ضربت طفل علي ايده وانت بتضحكله هيضحك لو ضربته نفس الضربة وانت مكشر هيعيط قوة الضربة واحدة متغيرتش لكن تفسير مخ الطفل للضربة هو اللي اتغير لما غيرت الاشارة اللي وصلاله وهنا كنز المسوقين مادام القرار مش معتمد عالمنتج نفسه والمخ اللي بيحكم علي حسب هواه طاب ميالا نلعب ف المخ .. ودا اساس ال Neuromarketing.
أتمنى أن يكون الدرس مفيد
تعليقات