 |
| شريف الشوادفي شريف |
ازاي الخوف بيغير توزيع الدم في الجسم فيخلينا ناخد قرارات غلط؟!
الجسم مبرمج لما يخاف الدم يتوجه ناحية العضلات والجهاز التنفسي للحماية والدفاع ويقل الدم اللي رايح يغذي المخ فتقل القدرة ع التفكير وتكون ف معدل ذكاء اقل م الطبيعي بتاعك فتاخد احلي قرارات غلط من اول شراء منتجات مش محتاجها عشان خايف الخصم يفوتك لحد شراء اشخاص اي كلام يدخلوا حياتك عشان خايف من الوحدة.
ازاي تستغل اتجاه حركة الاشارات العصبية ف الدماغ ف زيادة مبيعاتك؟
لحسن حظ المسوقين واصحاب البراندات الطريق بين قشرة المخ والاميجدالا (مركز الخوف ف المخ) بيكون اتجاه واحد طالع من مركز الخوف يوصل للقشرة ممنوع علي قشرة المخ انها تمنطق او تدقق او تصحح الاشارات والمعلومات اللي جاية من مركز الخوف حتي وان كانت مبالغ فيها ودي حكمة ربنا انه يخلي مركز الخوف يدي الخطر اكبر من حجمه ومحدش يراجع وراه فبالتالي الجسم يجهز دفاعات اكتر فيحمي الانسان وهنا بقا الفرصة بتاعتنا احنا المسوقين واصحاب المنتجات تحديدا ف الحتة اللي بتقول ان قشرة المخ مش هتعرف تصحح وتراجع المعلومات اللي جاية فنشتغل ف الاعلانات علي تنشيط مركز الخوف عند العميل فنقوىلك مثلا ان التكييف اللي عندك دا قديم وبيسرب غازات انت مش حاسس بيها بس بالتدريج ممكن تعمل اختناق لاطفالك عشان جهازهم التنفسي صغير والمعلومة تكون صحيحة انت مش بتنصب بس بتخوفه بزيادة بتضغط عليه بتستعجله بتجيبله صورة طفل ف الاعلان وهكذا فانت تخاف مركز الخوف ينشط يبعت اشارات الحقوني قشرة مخك عايزة تقولك يابني ارحمني محدش هيتخنق بكرة كفاية افورة بس مش هتقدر عشان الطريق اتجاه واحد فالمخ يضطر ياخد وضع الدفاع عنك عشان يحميك ويحمي عيلتك فياخد قرار شراء تكييف جديد
ازاي تزود مبيعاتك بالحب؟!
عملوا تجربة عالدكاترة عشان يخلوهم يهتموا اكتر بتعقيم ايديهم مرة كتبولهم ف المستشفي (التعقيم يحميك من الامراض) ومرة تاني كتبولهم (التعقيم يحمي المرضي من الاصابة بامراض اخري) المرة التانية زاد اهتمام الدكاترة بالتعقيم خوفهم علي المرضي كان اكتر من خوفهم علي نفسهم
بس مش الدكاترة بس لو تفتكر ايام كورونا (علي اساس انها خلصت وكدا) استغلوا نفس الفكرة دي وكانوا بيعملوا توعية انه متروحش الجيم عشان هتنقل العدوي لوالدك ووالدتك اللي ف البيت وبالفعل كانت بتأثر
الناس بتهتم بالناس اللي بيحبوهم وهنا بقا مربط الفرس لو بتبيع مكانس كهربا وجه الاعلان للرجالة وقولهم دا هيريح مراتاتكو لو بتبيع ساعات رجالي وجه اعلان للستات وقولهم دا هيبسط رجالتكو والعاب الاطفال نفس الفكرة وهكذا
مش دايما المشتري نفسه يكون هو المستهدف ف الاعلانات والحملات التسويقية ممكن نستهدف حبيبه عادي
تعليقات